Ekonomiaren Garapeneko eta Azpiegituretako sailburu Arantxa Tapiak inauguratu zuen Barakaldoko BECen egin zen World Maritime Week azoka.
Nazioarteko topaketa profesional honetan, eta izen beraren pean, Ontzigintza, Arrantza, Portuak eta Itsas Energia Berriztagarriak nazioarteko lau biltzarrak egin dira. Hiru lan-jardunaldietan euskal ekonomiak arlo horietan dituen aukerak aztertu dira.
Eusko Jaurlaritzaren standean arrantza-sektorearen jarduera guztien berri eman zen
Foro berean bildu diren lau ataletan (Sinaval, Eurofishing, FuturePort eta Marine Energy Week) 35 armadore eta ontziola enpresak eta lehenengo mailako ehun bat txostengilek parte hartu dute. Horrez gainera, erakusketa-eremu bat ere izan da, eta bertan 100 bat enpresak erakutsiko dituzte ekonomia urdina deitzen denaren azken berrikuntzak.
Offshore energia, hazten ari den merkatua
World Maritime Week azokaren gai edo ardatz nagusietako bat itsas energia izango da, egin den jardunaldi tekniko batean. “Offshore energia, hazten ari den merkatua” izenburupean egingo den mintegia Energiaren Euskal Erakundeak –Eusko Jaurlaritzaren energia agentzia–, TECNALIAk eta Bilbao Exhibion Centrek antolatu dute.
4.0 teknologia portuetan
Portuak funtsezko garraio-nodoak dira bai merkataritza-trafikorako bai arrantza-trafikorako edo kirol nabigaziorako. Hori dela eta, erne egon behar dute eskaera berrien aurrean, baita eraginkortasunez erantzuteko prest ere: digitalizazioa eta 4.0 teknologia jada errealitate dira portuetan.
Azpiegiturei dagokienez, Eusko Jaurlaritza Euskadiko portu eta trenbide arteko konexioak lantzen ari da garraio multimodalaren alde egindako apustua sendotzeko. Gaur egun, portu-azpiegitura lehiakorrak, dagoen eskaerari erantzuteko gai direnak, izatea da erronka, eta, horretarako, itsasoko eta lehorreko jardueren konexioa trenbidearen bidez hobetu behar da.
Atunontzi izoztaileak eta belaunaldien arteko txanda arrantza-sektorean
Sinaval-Eurofishing azokako merkataritza eta erakusketa jarduera osatzen duten hitzaldien, biltzarren eta mintegien baitan, Jaurlaritzak bi jardunaldi antolatu ditu, bat atunontzi izoztaileei buruzkoa eta, bestea, arrantza-sektoreko belaunaldien arteko txandari buruzkoa.
Eusko Jaurlaritzaren standean arrantza-sektorearen jarduera guztien berri eman da. Berrikuntza gisa, edizio honetan protagonismo berezia izan du standean akuikulturak, eta txoko bat eskainiko zaie sektorean garatzen diren ekimenei. Horien artean izan dira Kanpezun dagoen eta amuarrain ostadarraren ekoizpenean ari den Nusi enpresa; Hondarribian dagoen eta % 100 hazkuntza organikoa duen tilapia ekoizten duen Ner Bree; eta instalazioa Lekeitio eta Ondarroa arteko itsasbazterrean duen eta 1.000 tona muskuilu ekoiztea aurreikusten duen Matxitxako Moluskoak izeneko eta Euskadiko arrantza-sektoreko hainbat ekoizlek osatutako enpresa.
Era berean, standean, Osalanekin lankidetzan, Euskadiko itsasontzietan osasuna eta prebentzioa sustatzeko Arrantza Zuzendaritza egiten den lana ere aurkeztu da. Lan hori 2019-2025eko denbora-horizontean Ekonomiaren Garapen eta Azpiegitura Sailarekin lankidetza estuan Osalan – Laneko Segurtasun eta Osasunerako Euskal Erakundeak sustatutako Euskadipreben – Euskadiko Elikaduraren eta Egurraren Balio Katearen Laneko Segurtasun eta Osasunerako Estrategia Sektorialean gauzatu da.