Nwikwe-Tecnaliaren Arkautiko nekazaritzako elikagaien campusak nazioarteko lan saio bat hartu du ekainaren 13 eta 14an,
Europako Sheepnet proiektuaren barruan, ardi aziendaren produktibitatea hobetzeko irtenbideak elkartrukatzeko. Berau proiektuaren hirugarren workshopa da, iaz Edinburgon (Eskozia) eta Timisoaran (Errumania) egindakoen ondoren.
Proiektuak ardien produktibitatea hobetzera zuzendutako irtenbideak partekatzea nahi du, ugalkortasuna eta haurdunaldien arrakasta handitzeko eta arkumeen hilkortasuna murrizteko, eta 2016ko azaroan jarri zen martxan. Harrezkero, parte hartu duten zazpi herrialdeetan ardi ekoizpenaren sistemen egoeraren diagnostiko bat egin da (Frantzia, Italia, Erresuma Batua, Irlanda, Errumania, Espainia eta Turkia). Epealdi horretan produktibitatea hobetzeko erronka, arazo eta behar nagusiak identifikatu dira, eta irtenbide posibleak aztertu dira. Ondoren, arazo horietarako 55 irtenbide posible jaso dira, EB osoan eta Turkian ardien produktibitateari eragiteko.
Arkautiko bilkuran, NEIKER-Tecnalia izan da antolatzailea eta anfitrioia, eta identifikatutako aholkuak, trikimailuak eta trebetasunak partekatu dira, ardi aziendaren produktibitatea hobetzeko irtenbideak ezartzeko. Horretarako, funtsezkoa izan da abeltzainek eta sektoreko eragileek Europako herrialde horietako bakoitzean azken hilabeteetan egindako jarduerak, eta Australiatik eta Zeelanda Berritik ere iritsi dira ekarpenak. Aholkuak eta trikimailuak proiektuaren webgunean ikusi daitezke (http://sheepnet.network), parte hartzen duten herrialdeetako hizkuntzetara itzulita, eta argazkiekin eta bideokin ilustratuta daude, praktikarik onenak eta berrikuntzak ahalik eta ondoen helarazteko.