Bizkaiko Txakolinak Bizkaiko Txakolinaren Eguna ospatu zuen, Bilboko Kafe Antzokian.
Bertako festan izan ziren, azken urteko uztaren aurkezpenean, Peli Manterola Elikagaien Kalitate eta Industriako zuzendaria (Eusko Jaurlaritza), Jose María Aburto Bilboko alkatea, Elena Unzueta Iraunkortasuneko eta Ingurune Naturaleko foru-diputatua eta Iñaki Aretxabaleta jatorri-deituraren kontseilu arautzaileko lehendakaria.
Bizkaiko Txakolinak lortu duela sartzea nazioartean gehien eskatzen diren gourmet-produktuen artean
Peli Manterolak, eman zuen hitzaldian, azpimarratu zuen azken urte hauetan Bizkaiko Txakolinak lortu duela sartzea nazioartean gehien eskatzen diren gourmet-produktuen artean, eta bertan eusten ere asmatu duela. Izan ere, Alemanian azkenekoz egin duten Pro Wein azokan ikusi dugu “Txakolina izan dela produkturik kutunena, produktu ezberdina eta kalitatekoa baita”.
Nazioarteko merkatuak produktu ezberdinak nahi izaten ditu, eta txakolinak ez du aukera hori alferrik galdu behar. Horretarako, Eusko Jaurlaritzak, Euskadiko Elikagai Industriaren Planaren bidez, txakolinei eta euskal ardoei kanpoko ateak zabaltzeko moduko sustapen- eta merkaturatze-ekintzak lehenesten ditu, azokak eta alderantzizko misioak adibidez, hala, Erresuma Batua, Alemania, Frantzia edo Mexiko moduko merkatuetara heldu ahal izan gaitezen.
Bizkaiko Txakolinak aurtengoan izango dituen enbaxadoreak ere izendatu ziren, hain zuzen ere Athletic-eko neskak eta Eva Mena kale-artista, grafitigile eta horma-margogilea.