Aurtengo hegaluzearen kosteran, harrapaketei dagokienez, zifra oso positiboak lortu dira.
Izan ere, bost milioi kilo hegaluze inguru harrapatu dira; 2014an, ordea, 2,9 milioi harrapatu ziren eta 2013an 3,6 milioi. Horri guztiari prezioari nolabait eutsi zaiola erantsi behar zaio. Hala, prezioa batez beste 3,41 eurokoa izan da, iazkoaren parekoa ia-ia eta 2013koa baino pixka bat baxuagoa. Urte horretako prezioa 3,50 eurokoa izan baitzen.
Sektorea bera aritu dela Eusko Labeleko hegaluzea identifikatzen, kalitate- eta jatorri-irizpideei jarraiki.
Kostera honetako berritasunetako bat izan da, sektorea bera aritu dela Eusko Labeleko hegaluzea identifikatzen, kalitate- eta jatorri-irizpideei jarraiki. Esperientzia oso ona izan da. Eusko Label etiketarekin, guztira, 240.000 hegaluze identifikatu dira; zifra hori 2014. urteko kanpainakoa baino % 78 handiagoa izan da.
Hegaluzeak identifikatzeko jarduera hori (batez ere sektoreak berak egiten badu) oso garrantzitsua da, zeren artisau-kosterak eskatzen duen ahaleginari beste herrialdeen eskaintza-igoerak dakarren mehatxua erantsi behar zaio. Euskal arrantzaleek askotan salatu dute atzerriko arrain hori hemengoa balitz bezala saltzen dela prezio baxuetan, eta horrek Euskadiko arrantza-sektoreari kalte egiten dio.
Egoera horren aurrean eta Euskadiko arrantzaleen lana defendatzeko, Eusko Jaurlaritzak azpimarratu nahi du hegaluzea bereizita merkaturatzea oso garrantzitsua dela. Horregatik, azken urteetan egin den jarduketari eutsi zaio, hau da, Eusko Label etiketarekin identifikatu dira ahalik eta pieza gehien eta sektorea ahalik eta gehien inplikatu da. Horrela, arrandegietara joaten diren kontsumitzaileek ziurtasun guztiarekin jakin dezakete erosten ari diren hegaluzea gure arrantzaleek arrantzatutakoa dela, Euskadikoa dela eta kalitatekoa dela.
Era berean, Eusko Jaurlaritzak (HAZIren bidez) produktua ezagutzera emateko eta bere entzutea zein salmentak areagotzeko hainbat ekintza egin ditu, esaterako, Euskadiko arrandegietan sustapen-jarduketak egin, herriko jaietan hegaluzea parrilan erreta eskaini eta establezimenduetan zein ekitaldietan publizitatea jarri.
Eusko Labela: jatorria eta kalitatea pieza bakoitzean
Eusko Labela duen hegaluzea kalitate handiko arraina da. Euskadiko ontzietako arrantzaleek harrapatzen dituzte arrain horiek banan-banan eta sarerik gabe, arrantza-aparailu tradizionalekin: kanaberarekin (beita bizia) eta xaxiango arrantza edo kazako arrantzarekin. Metodo horiek, arrainaren kalitatea hobetzeaz gain, arrantzaguneen iraunkortasuna eta itsas baliabideei eustea bermatzen dute.
Hegaluzeak isatsean Eusko Labelaren segurtasun-zigilu zuri hautsezina dutelako identifika daitezke, baita beste datu batzuen bidez ere, esaterako, kontrolerako zenbaki bakarraren bidez.
Kontrol-zenbakiaren bidez eta webgunearen bidez, datu hauek guztiak ere jakin daitezke: ontziaren izena, espeziea, deskarga-portua, kofradia, deskarga-data, harrapaketagunea eta harrapaketa-modalitatea.
Eusko Labela duen hegaluzeak ezaugarri hauek izan behar ditu:
• Espeziea:Hegaluzea (Thunnus alalunga)
• Ontziak: EAEko ontziek harrapatzen dituzte arrantzako artisau-aparailuen bidez: Beita bizia eta xaxiango arrantza edo kazako arrantza.
• Hautaketa zorrotza: Neurri- eta freskotasun-irizpide jakin batzuei jarraiki, pieza onenak aukeratu eta identifikatzen dira.
• Gutxieneko tamaina errespetatzen dute: Hegaluzeek 4 kilotik gorakoak izan behar dute
• Freskotasun-kategoriaren eskakizuna: «Estra» eta «A».
• Portuak: EAEko arrantza-portu baimenduetan deskargatzen dira (Hondarribia, Getaria, Bermeo, Ondarroa, Pasaia eta Donostia).
Eusko Labela duen hegaluzeak bere erregelamendu tekniko espezifikoan ezarritako eskakizunak betetzen ditu. HAZIk eta bere kontrol-erakundeak erregelamendu hori betetzen dela gainbegiratzen dute.
Argazkiak: M. Arrazola.