Joseba Insaustiren gaztandegiko OTATZA gaztak irabazi du «Espainiako elikagaien» sariko 2015eko gazta onenari saria.
Nekazaritza, Elikadura eta Ingurumen Ministerioak ematen du sari hori eta, kasu honetan, «ardi-gazta onduaren» kategoriako irabazlea ere izan da aipatutako gazta.
Artzain hau ARTZAI GAZTA elkarteko kidea da eta, kasu honetarako, Aralarren egindako mendiko gazta aukeratu zuen. «Garrantzitsua dela uste dut, egun, mendian artzain-lanetan aritzen garela jakinaraztea, gazta mendian bertan eginez, mende askoan zehar egin den bezala», adierazi du.
Sari hauen helburua Espainiako gaztak sustatzea eta ezagutaraztea da; horretarako, sariak ematen dira behi-gazta, ardi-gazta, ahuntz-gazta eta
nahaste-gazta onduen eta gazta ondu lizundun edo gazta urdinen kategorietan. Sari horien artean «Espainiako elikagaien 2015eko gazta onenari» saria nabarmentzen da eta sari hori da, hain justu, Joseba Insaustiren Otatza gaztak jaso duena.
Jatorrizko Deituraren Kontseilu Arautzaileak bere poza adierazi du, lehenengo aldia baita Idiazabal gaztak sari hau jaso duela; hala ere, aurreko edizioetan, gazta onduaren edo ekologikoaren kategorian sariak jaso ditu. Bestetik, batik bat, artzainen lana eskertu du; izan ere, beren ekoizpenaren zati bat larre garaietan egiten dute eta «Euskal Herriko Mendiko Gazta» marka sortzeko apustua ere egin dute era kolektiboan. Marka honek «kontrol zorrotzenak pasatzeaz gain, antzinako ondare hau babesten du.»