Plataforma birtual bat eta Android terminalerako dagokion aplikazio mugikorra (App-a) plazaratu zuen apirilean The Food Mirror proiektuak (AZTI-Tecnaliak sustatua).
Tresna horri esker, elikadura-joerei buruz eguneroko bizimoduan aurkitzen dituzten berrikuntzak eta joerak parteka ditzakete erabiltzaileek, irudien bidez. The Food Mirror du izena aplikazioa. Doakoa da eta Google Playetik deskarga daiteke.
AZTI-Tecnaliarekin —itsas eta elikagai-arloko ikerketan espezializatutako zentro teknologikoa— lankidetzan jardungo den nazioarteko begirale- eta kontsumitzaile.komunitate zabal baten partaidetza ahalbidetuko du aplikazioak. Elikadura-kontzeptu berritzaileak identifikatzen laguntzen du aplikazioak, eta komunitatearen erabiltzaile guztiekin partekatzen ditu produktu, zerbitzu, ekimen, kanpaina, saltoki eta abarren irudiak, tresnari ezarritako bederatzi kategorietakoren batean: sense, experience, ethic, convenience, design, health, tech, communication eta people (zentzua, eskarmentua, etika, egokitasuna, diseinua, osasuna, teknologia, komunikazioa eta jendea).
Herritarren lankidetzak elikaduraren berrikuntzarako joera eta aukera berriak aurkitzen lagunduko die AZTI-Tecnaliako ikertzaileei, elikagai berriak sortzeko bidean.
Elikagaien lehen begirale- eta kontsumitzaile-komunitate orokor horren ekarpenak honako webgunean prozesatu, aztertu eta plazaratuko dira: www.thefoodmirror.com. Zenbait zerbitzu eskaintzen ditu aipatutako zentro teknologikoak proiektu horren bitartez, hiru ardatz hauen inguruan betiere: kontsumitzailearen eta joeren ikerketa, negozio-adimena (food business intelligence) eta gogoeta- eta sorkuntza-saioak.
Enpresa- eta gizarte-ikuspegitik ekiten dio The Food Mirror-i AZTI-Tecnaliak. Alde batetik, merkatua ikertzea du xede, kontsumitzailearen azterketa eta partaidetza sustatzeko metodologia aitzindariak erabiliz. Bestetik, ideia gauzagarriak eta konponbide errentagarriak eskaintzea ere helburu du, elikagaien eta gastronomiaren sektoreari negozio-erabakiak hartzen laguntzeko. Bartzelonako Feria Alimentarian aurkeztu zen aplikazioa.