Gaur egun, egunero erabiltzen ditugu teknologia berriak eta, lanbide baten lanean hasten garenean, gailu horiek burutu beharreko lana erosotasunez eta efikaziaz egiteko aukera ematen digute.
Duela urte gutxira arte, lana bulegotik kanpo gauzatzen zuten profesionalek ez zeukaten bulegoko tresnen abantailak eskaintzen dituzten tresnak erabiltzerik
Gailu mugikorrek, tabletak esate baterako, kanpoan beharrezko informazioa erraztasunez biltzea ahalbidetzen dute. Horrek erabakiak hartzen lagundu eta administrazioaren azkartasuna eta bizkortasuna areagotzen du, lursail bateko arazo eta gorabeherak jakinarazi eta ebaluatu behar direnean.
Tresna horiek izanez gero, ez da beharrezkoa argazki-kamera, GPSa, mapak eta planoak aldean eramatea lursailean kokatu eta datuak bertatik jasotzeko. Material horiek guztiak gailu mugikorrean daude barneratuta; horri esker, mugikortasuna handitu eta datuak hartzea errazten da. Era berean, zorroen eta pantaila-babesleen azken aurrerapenek kanpoan lan egitea errazten dute, inguru euritsu edo arriskutsuetan.
Horren harira, eta Euskal Autonomia Erkidegoko administrazioak lurpeko zein azaleko urak egoera onean egotea lortzeko Uraren Esparru Zuzentarauak ezarritako ildoei jarraiki egin beharreko lanak gauzatzeko, ikuskatzaileei EAEko ibaiak garbitzeko egiten diren jarduerak digitalki jasotzeko aukera ematen dien bitarteko baten beharra dagoela azaldu da, hiru lurralde historikoetan egitura bateratu eta mantenduta.
HAZI Fundazioak enpresentzako GIS aurreratuaren GvSig bezeroaren garapen espezifikoa egitea proposatu zuen, datuak biltzeko behar diren funtzionaltasun guztiak barneratzen dituena eta horietara egokitzen dena. Hala, tresna bakar batean datu kartografikoak ikustea, editatze grafiko xume eta gidatua, erabiltzaileen beharrizanetara egokitutako alfazenbakizko editatze espezifikoa, eta informazioa gordailu zentral batean gorde eta integratzea, ondoren emaitzak aztertu eta ustiatzeko, bezalako aukerak eskaintzen ditu. GPSa barneratuta duten gailuak erabili izan dira erabiltzailea erraz koka dadin lursailean. Argazki-kamera ere barneratuta izan dute. Horrela, nabarmen txikitu da ikuskatzaileak lana osorik burutzeko aldean eraman behar dituen gailu kopurua.
Irtenbidea bilatzeko orduan, funtsezkotzat jo zen kanpoan zein bulegoan jarduera-protokolo bera jarraituz lan egin ahal izatea.
Lana arindu eta ikuskatzaileek bildutako datuak formatu digitalera pasatzeaz gain, amaierako txostenak automatizatuko lirateke, ondorengo justifikazio eta ziurtagiriak erraztuz eta erabiltzaileen erroreak hein handi batean saihestuz.
Lanaren antolamendua erraza da itxura batean, baina kanpoan lan egiten duten erabiltzaileei estaldura zabalena eman nahi die, gaiaren araberako datu guztiak bildu ahal izan ditzaten, eta bulegoko teknikariei kanpoko inbentarioaren gordailu zentralean bildutako guztia kudeatzen lagundu.
Azaldutako guztiaren beste aplikazioetako bat Gipuzkoako Lurralde Historikoko azaleraren araberako laguntza-araubideen eremu-kontrolatzaileen berariazko beharrizanetara egokitutako tresna bat garatzea da. Inprimaki gidatuak eta erraz betetzekoak, kontrolaren emaitzari eransteko beharrezkoak diren inprimatzeko ereduak eta kanpoan datuak behar bezala hartzeko tresnak, onargarria den gehienezko azalera zuzen mantentzeko, emango zaizkie. Helburuetako bat lursailean dauden aprobetxamenduak egiaztatzea eta Sigpac datuak ez bezalakoak dituzten azaleren oharra egitea, ondoren eguneratzeko.
Hala, kontrolatzaileak lursaileko kontrol-prozesua hasieratik amaierara burutzeko behar dituen tresnak izango ditu: bulegoan informazioa prestatzea, lursailaren kontrola gauzatzea, dagokionari jakinaraztea eta kasuan kasuko administrazioari azken emaitzak entregatzea, baita informazioa biltzeko prozedura eta ondorengo tratamendu grafikoa eta alfazenbakizkoa arintzea, neurketak ahalik eta zehatzenak direla ziurtatzeko.
Testu eta argazkiak: Hazi Fundazioa. Lurralde-analisiaren eta Geografia-informazioko sistemen arloa
