AZTI-Tecnaliak 24 orduan kontserbako atuna zehazki zein espezietakoa den (hegaluzea, atun hegal-horia edo atun moja) jakiteko metodo berri bat garatu du.
Orain arte, ADNa zehazteko baliatutako metodologia genetikoek hainbat egun behar zituzten emaitza eztabaidaezinak lortzeko. Metodologia berritzailea oso interesgarria da kontserba-industriarako, eta etiketan agertzen dena egiaztatzen lagun dezakeen tresna da.
Ekoizpen-prozesuetako aldaketek iraultza eragin dute kontserba-industrian, izan ere, gaur egun, kontserbak inportatutako atunaren trontzo izoztuekin egiten dira askotan. Azalik gabeko trontzo horiek oso abantailatsuak dira prozesuen produktibitateari eta errendimenduari dagokionez. Hala ere, batzuetan, espezieak ikusiz bakarrik bereiztea zaila denez, kontserba etiketatzean akatsak egiten dira.
Espezieak ikusiz bakarrik bereiztea zaila denez, kontserba etiketatzean akatsak egiten dira.
Kontserbako atun prozesatuaren ADNa detektatzeko AZTI-Tecnalia Biologia Molekularreko Laborategiak garatutako sistemak espezieak bereiztea ahalbidetzen du, baita elikagaia prozesatuta dagoenean ere. Sistema Estatuko Akreditazio Entitateak (ENAC) ziurtatu du. AZTI-Tecnaliaren metodoak, bizkortasunaz gain, emaitza fidagarri eta eztabaidaezinak ere ematen ditu. Beraz, metodo berriak produktuak behar bezala etiketatzen direla ziurtatzeko eta kontsumitzaileei kalitatea bermatzeko aukera ezin hobea ematen du.
Kontserbak egiaztatzeko metodologiak arrain prozesatuaren, kontserbako arraina barne, edozein motatako laginen ADN zatien detekzioan oinarritzen dira. Metodo genetiko deritzen horiek oso fidagarriak dira, baina kasu gehienetan hainbat egun behar izaten dira emaitza eztabaidaezin bat lortzeko; horixe dute eragozpena. Hala eta guztiz ere, AZTI-Tecnaliaren sistema berritzaileak, zunda fluoreszenteetan oinarritutakoak, emaitza zehatza 24 orduan lortzea ahalbidetzen du.
ADNaren teknologia
AZTI-Tecnalia Biologia Molekularreko Laborategiak itsas espezieak egiaztatzeko metodo berriak garatzen jarraitzen du arrantzaren eta kontserben sektoreari bere trazabilitate-sistemak ziurtatzeko tresna efikazak eskaintzeko. ADNaren teknologiaren bidez, zentro teknologikoko espezialistek Kantauri itsasoko antxoaren eta hegaluzearen genetika identifika ditzakete, besteak beste. Halaber, arabica kafearen barietatea, jatorri-deitura babestuko gaztak, zukuak eta haragi-nahasketak, beste elikagai batzuen artean, egiaztatzeko sistemak dituzte.
Testu eta argazkiak: Azti-Tecnalia