Arantza Tapiak, Eusko Jaurlaritzako Ekonomiaren Garapen eta Lehiakortasunerako sailburuak, Bittor Orozek, Nekazaritza, Arrantza eta Elikagaien Politikako sailburuordeak, eta Basatxerri erakundeko ekoizle eta ordezkari Andoni Zabalak Eusko Label familiaren kide berria aurkeztu zuten
Bilboko Euskalduna Jauregian: Baserriko Txerria. Hala, dagoeneko 16 produktuk dute Eusko Label kalitate-bereizgarria.
Eusko Labeldun Baserriko txerriaren haragia kalitate eta osasun-berme handiko produktu bat da, eta EAEn hazi, hil eta zatikatutako animalietatik dator. Kanpoan hazten dira, eta animaliaren ongizatea errespetatzen da. Horrez gain, produkzioaren fase guztiak Hazik ezarritako araudiaren araberako kontrol zorrotzen bidez ikuskatzen dira. Horri guztiari pentsu osatuetan oinarritutako elikadura eta ustiategiaren berezko baliabideak gehitzen zaizkio, eta, horrela, kalitate handiko haragia lortzen da, kolore biziagoa eta infiltraturiko koipe gehiago duena.
Eusko Labeldun Baserriko txerriaren haragia kalitate eta osasun-berme handiko produktu bat da, eta EAEn hazi, hil eta zatikatutako animalietatik dator
182-250 egun dituztenean hiltzen dituzten eta, orduan, gorpuzkiak sailkatzen dira, araudian zehaztutako ezaugarrien arabera, hau da: pisua (gutxienez 95 kg), osaera, koipea, haragiaren kolorea, ph-a, etab. Hala, kalitate kontrol guztiak gainditzen dituztenak baino ez dira Eusko Labeltzat jotzen.
Homologazioa, beharrezkoa
Eragile guztiek homologazioa behar dute: ekoizleek, pentsu fabrikatzaileek, hiltegiek, zatikatzeko eta xerrak egiteko aretoek, saltokiek zein lantzaileek. HAZI erakundeak, organo kontrol-egile eta ziurtagiri-emale den heinean, produktuaren trazabilitatea, kalitatea, segurtasuna eta egiazkotasuna bermatzen du, kontrolen bitartez.
Produktu freskoa Eusko Labelek baimendutako harategietan baino ezin da ebakita aurkitu. Saltzean, Eusko Labeldun Baserriko Txerriaren haragiak etiketa ziurtagiri bat izango du, zenbakitua, benetakotasuna bermatzen duen Eusko Labelen logotipoarekin.
Txerriki freskoaz gain, kontsumitzaileak Eusko Labeldun Baserriko Txerriaz egindako beste produktu batzuk ere aurki ditzake, Hazi erakundeak aurretiaz erregistratu eta baimendutako enpresa adituek eginak. Produktu landu horiek enbasatzeko lekuan Eusko Labela duen Baserriko Txerriaz eginda dagoela dioen etiketa jarri eta gero merkaturatzen dira. Eusko Label produktu honekin egindako produktuak dira, besteak beste: urdaiazpiko egosi estra, gibel-atea, urdaiazpiko ondua, txorizoa, saltxitxoia, txistorra, azpizuna, hirugihar adobatua/ondua…
Etorkizuneko aukera
Gaur egun, Euskadin txerrikiaren per capita kontsumoa 10 kilo/urte ingurukoa da, eta bertako horniduraren maila, aldiz, % 6-7 ingurukoa. Arantza Tapiak adierazi duenez, “hazkunde marjina handia dago, sektoreak etorkizuna dauka, eta, gure iritziz, txerriaren sektoreak dagokion tokia bete behar du Euskadiko nekazaritza-sektorean. Sektore berezia da, gure lurrari, gure paisaiari, gure kulturari eta idiosinkrasiari oso lotua; baina, batez ere, gure ekoizpen-ekonomian leku garrantzitsua duen sektorea da. Sektore profesionala da, eta balio erantsiko eta kalitate handiko produktuak ematen ditu”.
Hazik, Landa eta Itsasertz Garapenerako Eusko Jaurlaritzako Korporazioak, baldintza eta prozesu landuak ezartzen ditu produktu bati Eusko Label kalitatearen bereizgarria emateko. Helburu nagusiak hauek dira: kontsumitzaileari kalitate maila bermatzea, jatorria eta egiazkotasuna identifikatzea, ekoizleen lana babestea eta kalitatearen kultura sustatzea, horretarako etengabeko hobekuntza sistemak aplikatuz.
Oinarrizko baldintzen artean hauek nabarmentzen dira: Euskadikoak izatea, goi-mailako kalitatekoak izatea, gutxieneko bolumena izatea, kolektibo bati mesede egitea eta aipatutako ezaugarriak bermatzen dituen kontrol-sistema bat edukitzea.
Tapiak esan duenez, “mundu globalizatu honetan, produktuak kalitate-bereizgarrien bidez identifikatzeak eta bereizteak funtsezko izaten jarraitu behar du. Apustu honek zigilu hauen babespean dauden produkzioen arrakasta ekarri du eta ziur gaude hori dela jarraitu beharreko bidea”.